KARVONOVA GULZODA SAIDAHMAD QIZI

Karvonova Gulzoda Saidahmad qizi 2007-yil 3-oktabrda Samarqand viloyati Ishtixon tumani Yangiyer qishlog‘ida oddiy mehnatkash oilada tavallud topgan. Ota-onasi uning bilimli, ma’naviyatli va keng dunyoqarashga ega inson bo‘lib voyaga yetishini istagan. U bolaligidan ota-onasining ilm olishga bo‘lgan rag‘batlari va bildirgan ishonchlari unda ta’limga, izlanishga hamda o‘z ustida ishlashga qiziqishni shakllantirgan.

Gulzoda ta’limni nafaqat bilimlarni egallash jarayoni, balki inson tafakkurini rivojlantirish, mustaqil fikrlash qobiliyatini shakllantirish va jamiyat taraqqiyotiga munosib hissa qo‘shish vositasi sifatida qadrlaydi. Uning boshlang‘ich ta’lim sohasiga qiziqishi kelajak avlodning intellektual salohiyati, ma’naviy kamoloti va ilmiy dunyoqarashini shakllantirishda faol ishtirok etish istagi bilan bog‘liq.

Hozirgi kunda u Jizzax Davlat Pedagogika universitetida boshlang‘ich ta’lim sohasida tahsil olayotgan bo‘lib, kelgusida nazariy bilimlarini amaliy tajriba bilan uyg‘unlashtirib, pedagogika va zamonaviy ta’lim metodikasi yo‘nalishlarida muntazam izlanishni maqsad qilgan. Shuningdek, u filologiya fanlari doktori bo‘lishni va ota-onasi faxrlanadigan farzand bo‘lishni ham maqsad qilgan.

Bo‘sh vaqtida kitob mutolaa qiladi va tikuvchilik bilan shug‘ullanadi. Uning fikricha, lider bo‘lish uchun eng muhim fazilatlardan biri — ilmga chanqoqlik va tanqidiy fikrlashdir. U haqiqiy lider doimo izlanishi, yangiliklarni o‘rganishi, dalillarga asoslanib qaror qabul qilishi va o‘z bilimini jamiyat taraqqiyoti yo‘lida qo‘llashi kerak, deb hisoblaydi.

Boshqalar undan tarbiya va insoniylikni o‘rganishlari mumkin, deb hisoblaydi. Shuningdek, u bugun hamda kelajak uchun yoshlarni ruhlantiradi, ularga bilim olishning ahamiyatini va o‘z maqsadlariga erishish uchun doimiy izlanish zarurligini ta'kidlaydi.

U puxta bilim, tinimsiz izlanish, mas’uliyat va kasbga bo‘lgan muhabbat orqali jamiyat ravnaqi hamda yosh avlod ta’lim-tarbiyasiga munosib hissa qo‘sha olishiga ishonadi. Karvonova Gulzoda Saidahmad qizi o‘z ichidagi qobiliyatlardan foydalanib, o'z xalqiga foydali bo'lishni maqsad qilgan.