Muhammadjonova Laziza G'ayratjon Qizi

Lazizaning bolaligi Toshkentning Mirobod tumanida o'tdi. Oilada katta farzand bo'lib o'sganligi, uni har doim oldinga harakat qilishga undadi. Aytishicha, ota-onasining ishonchi va qo'llab-quvvatlashi, uning shaxs sifatida shakllanishida muhim rol o'ynadi.

U 2024-yilda Toshkent Davlat Iqtisodiyot Universitetiga qabul qilindi va Menejment fakultetining Menejment yo'nalishida o'qiy boshladi. 2026-yil o'quv yili boshidan esa fakultet talaba qizlari koordinatori lavozimida faoliyat olib bormoqda.

Talabalar o'rtasida tashkil etiladigan tadbirlarda faol ishtirok etgan Laziza, universitetda voleybol sport turi bo'yicha o'tkazilgan "Rektor kubogi" musobaqasida 1-o'rinni egalladi. Shuningdek, u "Eng yaxshi reportaj sohibasi" nominatsiyasida ham g'oliblikni qo'lga kiritdi. Barcha tadbirlarda ishtirok etib, faxrli o'rinlarni egallashga muvaffaq bo'ldi.

Lazizaning hayotiy shiori "Hayotda 'men qila olamanmi?' deb emas, 'men hammasini uddalayman' deb yashash kerak. Chunki o'zimizga bo'lgan ishonchimiz hammasidan muhim!". Uning fikricha, liderlik uchun eng muhim fazilat — o'ziga bo'lgan ishonch va hech narsadan qo'rqmaslikdir.

Laziza bo'sh vaqtlarida fakultetida o'tkaziladigan tadbirlarni rejalashtiradi va talabalarning vaqtini samarali o'tkazishiga yordam beradi. U doimo hayotida yangi imkoniyatlar yaratishga intiladi va faoliyatini kengaytirish uchun harakat qiladi.

U kelajakda magistraturani ham tugatib, jamiyatga foydasi tegadigan yetuk kadr bo'lishni maqsad qilgan. Buning uchun o'z ustida ishlashini va yangi bilimlar olishini davom ettirishni rejalashtirmoqda.

Kelajakda Laziza, o'zining yig'ilgan tajriba va bilimlaridan foydalanib, nafaqat shaxsiy rivojlanishga, balki jamiyatga ham xizmat qilishni maqsad qilmoqda. Uning qat'iyati va mehnatsevarligi boshqa yoshlar uchun ilhom manbai bo'lishi mumkin.