Xidirova Maftuna Rizaqul qizi

Maftuna Xidirova bolajonligidan beri bilimga chanqoq shaxs sifatida rivojlanib kelgan. Uning hayotida ota-onasining roli beqiyosdir. Ular doimo Maftunani har bir qarorida qo‘llab-quvvatlashgan, yutuqlaridan esa o‘zidan ham ko‘proq quvonishgan. Bunday yondashuv uning o'ziga nisbatan ishonchini oshirgan.

U Samarqand Davlat Universitetida o‘qishni boshlashdan oldin o‘ta qobiliyatli va intiluvchan talaba sifatida o‘zini ko‘rsatgan. Ona tili fanidan sertifikat olib, viloyat bosqichida o‘tkazilgan musobaqalarda faxrli o‘rinlarni egallagan. Shuningdek, Maftuna “Qizlar akademiyasi” jurnalistika kursini muvaffaqiyatli tugatgan va onlayn notiqlik kursini a’lo natija bilan yakunlagan. Hozirgacha u “Harbiy sohasidagi ayollar psixologiyasi” mavzusida 10 ga yaqin maqola yozib, jurnallarda chop etgan.

Maftunaning hayotiy shiori shundaki, “Insonning hayotida ikkita eng muhim kun bo‘ladi: biri — uning dunyoga kelgan kuni, ikkinchisi — nima uchun dunyoga kelganini anglagan kuni!” Bu shior orqali u o‘zi va boshqalar uchun ham maqsadlarni topish muhimligini ta’kidlaydi. Bo‘sh vaqtida til o‘rganishga katta e’tibor beradi. Hozirda ingliz tilini B2 darajada bilishi va o‘z bilimlarini yanada oshirish niyatida turk tilini mustaqil o‘rganishni boshlagan.

Maftuna kelajakda harbiy psixologiya sohasida faoliyat yuritishni rejalashtiradi. U harbiy sohadagi ayollarni o‘rganish va ular bilan ishlashga qiziqadi. Shuningdek, jurnalistika sohasida ham o‘zini sinab ko‘rishni xohlaydi. U fikricha, lider bo‘lish uchun avvalo boshqalarga to‘g‘ri o‘rnak bo‘la olish va har qanday holatda ham o‘zini to‘g‘ri tutish zarur.

Xidirova Maftuna Rizaqul qizi ta’lim olish jarayonida ko‘plab yutuqlarga erishgan, bunda ota-onasining roli muhim ahamiyatga ega. U har doim o‘z maqsadlariga intilib, kelajakda nafaqat psixologiya, balki jurnalistika sohasida ham muvaffaqiyatlar qozonishni rejalashtirmoqda. Uning hayotdagi yondoshuvi va prinsiplariga asoslangan holda, Maftunaning kelajagi yorqin va umidvor bo‘lishi mumkin.