Asilbek Abdurahmonov Umidovich
Asilbek Abdurahmonov Umidovich 08/01/2009 kuni Buxoro viloyati, Kogon shahri, Zirabodda tug‘ilgan. U Mirzo Ulug‘bek tumani, Toshkent viloyatida yashaydi. U Buxoro viloyati Kogon shahridagi 5-IDUMda 10-sinf oxirigacha tahsil olgan, 11-sinfdan Ulug‘bek maktabiga o‘qishga ko‘chgan. Hozirda Jahon iqtisodiyoti va diplomatiya universiteti (JIDU)ning Jahon iqtisodiyoti va menejment yo‘nalishida tahsil oladi.
U faoliyatini maktab davrida matematika faniga bo‘lgan qiziqishi orqali boshlagan. Dastlab matematika bo‘yicha turli tanlov va olimpiadalarda qatnashgan. Uning muhim yutuqlari qatorida matematika fanidan Milliy sertifikatning A+ darajasini qo‘lga kiritgani, SATning matematika qismidan 790 ball olgani hamda Buxoro viloyati matematika olimpiadasida 2-o‘rinni egallagani bor.
Asilbek Velix Academy ta’lim kanalini tashkil qilgan. Kanal orqali SAT bo‘yicha ta’limiy materiallar va darslar ulashib boriladi hamda u Telegram’da 1200+ obunachiga ega. Shuningdek, u PayTrack ilovasi ustida ishlab, uni yo‘lga qo‘ygan. Ushbu loyihalar orqali tashabbuskorlik va loyiha boshqarish ko‘nikmalarini rivojlantirib kelmoqda.
Uning ta’limga kirib kelishiga matematika ustozi Farhod Hamroyev katta ta’sir ko‘rsatgan. Farhod Hamroyevning matematik tushunchalarni sodda va tushunarli tarzda izohlashi Asilbekning mazkur fanga qiziqishini oshirgan. Bu yo‘lda ota-onasining doimiy qo‘llab-quvvatlashi va ishonchi ham muhim o‘rin tutadi.
Bo‘sh vaqtida u kurash, kikboksing, armrestling va stol tennisiga qiziqadi, matematika hamda boshqa yangi bilimlarni o‘rganadi. Velix Academy va PayTrack loyihalari ustida ishlaydi, yangi g‘oyalar izlash va o‘z ustida ishlashga vaqt ajratadi. Uning hayotiy prinsipi: «To‘xtama, harakat qil va kechagidan yaxshiroq bo‘lishga intil».
Kelajakda u JIDUda olgan bilimlarini yanada rivojlantirib, xalqaro darajada tajriba orttirishni, xorijda o‘qish va turli xalqaro dasturlarda qatnashishni xohlaydi. Velix Academy hamda PayTrack loyihalarini katta auditoriyaga olib chiqish, o‘z sohasida kuchli mutaxassis bo‘lish, katta loyihalar yaratish va jamiyatga foyda keltirishni maqsad qilgan.