Dilmuradova Charosxon Zafar Qizi

Dilmuradova Charosxon Zafar qizi 07.07.2008-yilda Navoiy viloyatining Zarafshon shahrida tug‘ilgan. Hozirda Toshkent shahri, Chilonzor tumanida yashaydi.

U o‘rta maxsus ta’limga ega bo‘lib, PIMA — Prezident ixtisoslashtirilgan maktab agentligi tasarrufidagi Tomdi ixtisoslashtirilgan maktab-internatida tahsil olgan. U huquq asoslari va huquq ta’limi yo‘nalishida o‘qiydi.

Charosxon maktab-internatidagi o‘quvchi-yoshlar uchun Milliy sertifikat tayyorlov kursida yosh yetakchisi sifatida faoliyat yuritadi. U 2 yillik tajribaga ega yosh mutaxassis hamda oliy ta’lim universitetida koordinator hisoblanadi. U 3 yil “Kamalak” bosh sardori bo‘lgan, maktab “Yoshlar yetakchisi” sifatida faoliyat yuritgan va ushbu faoliyat doirasida loyihalar tashabbuskori bo‘lgan. Bir necha karra viloyat bosqichida faxrli o‘rinlarni egallagan. U ona tili va adabiyot, ingliz tili hamda tarix fanlaridan yuqori darajali sertifikatlarga ega, shuningdek, O‘zbekiston “Vatan tayanchi” otryadi a’zosi.

Uning rivojlanishi va kurashdan to‘xtamasligi uchun turtki bo‘lgan ikki inson — onajoni va dadajonidir. Ularning ko‘zlaridagi ishonch uni doimo harakatda bo‘lishga undaydi. Uning hayotiy prinsipi: “Har bir natijam ortida ota-onamning duosi, har bir muvaffaqiyatimda ularning mehnati bor”.

Bo‘sh vaqtida u yangi bilimlarni egallash va o‘z ustida ishlashga intiladi. Buyuk liderlarning hayot yo‘li, muvaffaqiyat sirlari, kuchli iroda, qat’iyat va yetakchilik fazilatlari unga ilhom beradi. U dunyoqarashini kengaytirish, o‘z oldiga ulkan maqsadlar qo‘yish hamda ularga erishish uchun tinimsiz harakat qilishni muhim deb biladi. Uning fikricha, haqiqiy lider boshqalarga o‘rnak bo‘la oladigan, qiyinchiliklardan qo‘rqmaydigan, xatolaridan saboq oladigan, atrofidagilarning yutuqlari haqida ham qayg‘uradigan insondir. U lider uchun qat’iyat, mas’uliyat, halollik va odamlarga hurmatni eng muhim fazilatlar deb hisoblaydi.

Uning kelajakdagi eng katta maqsadi bilimli, kuchli irodali, o‘z so‘zi va amaliga ega, jamiyatga foyda keltiradigan yetuk inson bo‘lib yetishishdir. U o‘z sohasida muvaffaqiyatga erishish bilan birga, boshqalarga motivatsiya beradigan, insonlarga yordam qo‘lini cho‘zadigan va yoshlarni ezgu maqsadlar sari ruhlantiradigan lider bo‘lishni istaydi. Uning ulug‘ orzularidan biri — onasining unga bo‘lgan ishonchini oqlash, onasini faxrlantirish va yuzida quvonch tabassumini ko‘rishdir. U qat’iyat, sabr, halollik va tinimsiz mehnat bilan eng katta orzularga ham erishish mumkinligiga ishonadi.

Charosxon o‘zini hali yozilmagan eng go‘zal hikoya deb biladi. U hali kashf etishi kerak bo‘lgan imkoniyatlar, amalga oshirishi kerak bo‘lgan orzular va zabt etishi kerak bo‘lgan marralar egasi ekanini ta’kidlaydi. U o‘zligini yo‘qotmagan holda yuksalishni, kelajakda ismi emas, qilgan ishlari eslab qolinishini istaydi. Uning fikricha, insonning haqiqiy qadri qanchalik mashhurligida emas, dunyoga qanday foyda keltirganidadir.