Mirzayeva Sevinch Azamatovna

Mirzayeva Sevinch Azamatovna 17.04.2009-yilda Qashqadaryo viloyati, Qarshi shahrida tug‘ilgan. U Toshkent viloyati, Nurafshon shahrida yashaydi.

U Toshkent davlat yuridik universitetining Jinoiy odil sudlov fakulteti 1-kursida yurisprudensiya yo‘nalishida tahsil oladi. Shuningdek, Toshkent viloyati Nurafshon shahridagi 1-umumiy o‘rta ta’lim maktabini tamomlagan.

Sevinch maktab davrida a’lo baholarga o‘qib, oltin medal bilan taqdirlangan hamda maktabning ijtimoiy hayotida faol ishtirok etgan. U huquq olimpiadalarida qatnashib, munosib o‘rinlarni egallagan va “Huquq bilimdoni” tanlovida 3-o‘rinni qo‘lga kiritgan. Toshkent davlat yuridik universitetiga qabul qilingani uning ta’lim yo‘lidagi muhim yutuqlaridan biridir. U ona tili, matematika va tarix fanlaridan milliy sertifikatlarga, ingliz tilidan esa B2 darajadagi sertifikatga ega.

Uning hayotiga eng katta ta’sir ko‘rsatgan insonlar otasi va onasidir. Ota-onasining ishonchi, cheksiz mehr-muhabbati va doimiy qo‘llab-quvvatlashi uning hayotdagi eng katta tayanchidir. Aynan ular unga ilm olish, katta maqsadlar sari intilish, qiyinchiliklar oldida taslim bo‘lmaslik va har qanday vaziyatda insoniylikni saqlashni o‘rgatgan. U uchun ota-onasining ishonchini oqlash va ular faxrlanadigan farzand bo‘lish eng katta baxtdir.

Sevinchning asosiy prinsiplaridan biri — har qanday vaziyatda ham vijdoniga, qadriyatlariga va adolatga sodiq qolishdir. U ota-onasi uchun munosib farzand bo‘lishni, ilmga intilishni va hech qachon insoniylikni yo‘qotmaslikni muhim qadriyat deb biladi.

Bo‘sh vaqtida u badiiy va huquqiy kitoblar mutolaa qiladi, xorijiy tillarni o‘rganadi hamda til ko‘nikmalarini rivojlantiradi. Shuningdek, ilmiy va ma’rifiy ma’lumotlarni o‘rganish, dunyoqarashini kengaytirish va yangi g‘oyalar ustida ishlashga vaqt ajratadi. U til bilish ko‘plab imkoniyatlar ochib berishiga va o‘z sohasiga doir bilimlarini kuchaytirishiga ishonadi.

Uning fikricha, lider bo‘lish uchun eng muhim fazilat — mas’uliyatni o‘z zimmasiga olish va odamlarga namuna bo‘la bilishdir. U haqiqiy lider jamoasini tinglashi, qiyin vaziyatlarda qaror qabul qilishi, muvaffaqiyat va xatolarni jamoasi bilan baham ko‘rishi, boshqalarga o‘z imkoniyatlarini namoyon etish uchun yo‘l ochishi kerakligini ta’kidlaydi.

Kelajakda Sevinch Harvard yoki Stanford universitetlarida tahsil olib, xalqaro tajriba orttirishni va huquqshunoslik sohasida yetuk mutaxassis bo‘lib yetishishni orzu qiladi. U prokuratura tizimida faoliyat yuritish hamda O‘zbekiston Respublikasi Oliy Majlisi Senati Raisi lavozimida ishlashni maqsad qilgan. Uning eng katta intilishi — xalqiga xizmat qilish, adolat va qonun ustuvorligini ta’minlash, yoshlar uchun yangi imkoniyatlar yaratish hamda ota-onasining ishonchini oqlaydigan, Vatani faxrlanadigan inson bo‘lishdir.

U yoshlarni katta maqsadlar sari intilishga, ilm olishga, o‘ziga va o‘z imkoniyatlariga ishonishga, hech qachon orzularidan voz kechmaslikka undaydi. Shuningdek, egallangan bilimlarni jamiyat manfaatlari yo‘lida qo‘llash muhimligini ta’kidlaydi.

“Yoshlik — imkoniyat kutish davri emas, balki bilim, mehnat va qat’iyat bilan o‘z kelajagingizni yaratish davridir.”