Olimjonova Mubina Oybek qizi

Mubina Olimjonova Oybek qizi 2008-yil 25-avgustda Andijon viloyati, Asaka tumanida tug‘ilgan. Hozirda Toshkent shahri, Olmazor tumanida yashaydi.

U 2026–2027-o‘quv yili uchun Toshkent davlat tibbiyot universiteti (TDTU)ga grant asosida o‘qishga kirgan. Bundan avval 11-ixtisoslashtirilgan davlat umumta’lim maktab-internatini (IDUMI) tamomlagan. U Toshkent davlat tibbiyot universitetining stomatologiya fakultetida tahsil oladi va faoliyatini ayni o‘quv yilidan boshlaydi. Bu yo‘lga yoshlikdagi orzu va maqsadlari ortidan kelgan.

Mubina qiziquvchanligi sababli foydali mashg‘ulotlarni sinab ko‘rishga intiladi; onasi bunga qarshi emas. U maktabdagi badminton sport musobaqasida 1-o‘rinni, voleybol sport musobaqasida esa guruhi bilan 2-o‘rinni olgan. Sun’iy intellekt bo‘yicha «Five Million AI Prompters» kursini tamomlagan. «Qizlar akademiyasi» loyihasida «Ginekologiya», «Uy dekorlash san’ati» hamda «Targ‘ibot tadbirlarini to‘g‘ri tashkil etish» kurslarini tamomlab, sertifikat olgan. Shuningdek, ta’lim yo‘nalishiga oid, Bilim va malakalarni baholash agentligi tomonidan taqdim etilgan umumta’lim fanini bilish darajasi to‘g‘risidagi bir qancha sertifikatlarga ega.

U bo‘sh vaqtida oilasi bilan vaqt o‘tkazishni yoqtiradi va hayotida oilasining o‘rni alohida ekanini ta’kidlaydi. Muntazam til o‘rganadi, odatda juda charchagan vaqtlarida badiiy kitob o‘qiydi. Video montaj va foto yaratish bilan shug‘ullanadi, Instagramda kitoblar haqidagi videolar va iqtiboslarni ulashadi, ba’zan esa kitob sovrinli o‘yinlar o‘tkazadi.

Uning asosiy shiori: «Bugungi “men” kechagi “men”dan kuchliroq bo‘lishi kerak». U xohlagan hayotni hech kim uning uchun qurib bermasligini biladi va kutmaydi — yaratadi. Uning fikricha, liderlikning eng muhim fazilati mas’uliyatni o‘z zimmasiga olishdir. U to‘g‘ri qaror qabul qilish, jamoani tinglay olish, ularga ishonch va motivatsiya berish hamda boshqalarni to‘g‘ri yo‘naltira olish qobiliyatini ham muhim deb biladi.

Mubina kelajakda o‘z sohasida kuchli va malakali stomatolog bo‘lishni xohlaydi. Uning maqsadi shunchaki diplom olish emas, balki kasbini chin dildan biladigan, doim rivojlanadigan va odamlar ishonadigan mutaxassis bo‘lishdir. U moliyaviy jihatdan mustaqil bo‘lishni, o‘z daromadini yaratishni, bir kun kelib o‘z biznesi va klinikasiga ega bo‘lishni istaydi. Onasiga yaxshi hayot yaratish, uning mehnatlarini o‘z yutuqlari bilan qaytarish hamda onasi hech narsani o‘ylamasdan yashaydigan darajaga yetishini ta’minlash uning eng katta orzularidandir.

U dunyoni ko‘rishni, Koreya, Indoneziya, Buyuk Britaniya, Germaniya va boshqa ko‘plab davlatlarga sayohat qilishni xohlaydi. Turli madaniyatlarni ko‘rish, yangi joylarni kashf qilish, chet tillarini yuqori darajaga olib chiqish va xalqaro muhitda erkin his qilishni orzu qiladi. U kuchli, mustaqil va o‘z hayotini o‘zi qurgan inson bo‘lishni istaydi. Maqsadlariga navbati bilan, sabr va intizom bilan, oxirigacha erishishga intiladi.

U biror narsaga qiziqib qolsa, uning barcha detallarini bilmagunicha tinchimaydi. Rejalari o‘zgarishi mumkin, biroq katta maqsadlari o‘zgarmaydi. U odamlardagi samimiylikni juda qadrlaydi, imkon bo‘lsa, ishni hoziroq boshlashni afzal ko‘radi va o‘zini bitta rol yoki bitta yo‘l bilan cheklab qo‘yishni istamaydi.

Boshqa yoshlar uchun uning motivatsion fikri: «O‘zgalar seni sindirish uchun aytgan so‘zlarni uchishing uchun qanotga aylantir.»