Раимова Дилноза Еркиновна
Dilnoza Raimova 2008-yil 28-iyun kuni Buxoro shahrida tug‘ilgan. Hozirda Toshkent shahrida yashaydi. U O‘zbekiston davlat jahon tillari universitetining 2-bosqich talabasi bo‘lib, filologiya sohasida tahsil oladi.
Uning filologiyaga qiziqishi maktab davridan boshlangan. Dilnoza tilni shunchaki muloqot vositasi emas, balki inson tafakkuri, madaniyati va dunyoqarashini aks ettiruvchi muhim vosita sifatida ko‘radi. Ingliz tilini o‘rganish jarayonida uning tuzilishi, so‘zlarning kelib chiqishi hamda turli xalqlar madaniyati bilan bog‘liqligi unga yanada katta qiziqish uyg‘otgan. Aynan shu qiziqish uni filologiya yo‘nalishini tanlashga undagan. Hozirda u til bilimlarini chuqurlashtirib, kelajakda egallagan bilimlarini boshqalarga yetkazish yo‘lida izchil faoliyat olib bormoqda.
Dilnoza IELTSdan C1 daraja va 7.0 natijaga ega. Shuningdek, u ona tili bo‘yicha Milliy sertifikatga hamda universitetdagi «A’lochi stipendianti» maqomiga ega.
Uning hayotiga eng katta ta’sir ko‘rsatgan inson — otasi. Otasining mehnatsevarligi, mas’uliyatliligi va har qanday vaziyatda to‘g‘ri yo‘l topa bilishi Dilnoza uchun namuna bo‘lib kelgan. Otasi unga hayotda hech narsaga osonlik bilan erishilmasligini, inson o‘z maqsadi sari sabr va qat’iyat bilan harakat qilishi kerakligini o‘rgatgan. Bu ta’sir uning o‘z ustida ishlash, bilim olish va kelajakda yaxshi mutaxassis bo‘lishga intilishida muhim o‘rin tutadi.
Bo‘sh vaqtida Dilnoza xitoy tili va boshqa chet tillarini o‘rganadi, yangi bilim va ko‘nikmalarni egallaydi. Til o‘rganish orqali turli xalqlar madaniyati bilan yaqindan tanishishni yoqtiradi. Ba’zan til o‘rganish qiyin bo‘lsa-da, qiziqishi sababli davom etadi. Bu unga sabrli bo‘lishni va maqsad sari asta-sekin bo‘lsa ham harakat qilishni o‘rgatgan. U atrofidagi insonlarga ijobiy munosabati va harakati bilan motivatsiya bera olishiga ishonadi.
Uning hayotiy shiori: «Ba’zan eng katta o‘zgarishlar eng kichik qadamdan boshlanadi». Dilnoza lider uchun eng muhim fazilat mas’uliyatni o‘z zimmasiga olish va boshqalarga to‘g‘ri yo‘l ko‘rsata bilish deb hisoblaydi. Uning fikricha, haqiqiy lider boshqalarni tinglaydi, qo‘llab-quvvatlaydi va o‘z harakati bilan namuna bo‘ladi.
Kelajakda u xorijiy tillarni mukammal o‘zlashtirish, xalqaro tajriba orttirish va o‘z sohasida yetuk mutaxassis bo‘lishni maqsad qilgan. Ta’limini rivojlantirish, xorijda tahsil olish hamda o‘z bilimlari orqali yoshlar, ayniqsa, qizlarning ta’lim olishiga hissa qo‘shish uning eng katta orzularidandir. Dilnoza odatda boshqalar tanlashga jur’at qilmagan qiyinroq yo‘llarni sinab ko‘rishni yoqtiradi, o‘zida bundan ham ko‘proq imkoniyat borligiga ishonadi va imkoniyatlarini sinab ko‘rishdan qo‘rqmaydi. Uning uchun qiyinchilik to‘xtash uchun sabab emas, balki o‘zini yanada kuchliroq sinab ko‘rish uchun imkoniyatdir.
«O‘zingizni boshqalarning chegaralari bilan o‘lchamang, chunki sizning imkoniyatlaringiz hali o‘zingiz o‘ylagandan ham kengroq. Qiyin yo‘ldan qo‘rqmang, chunki aynan shu yo‘l sizni boshqalardan ajratib turadigan tajribalarni beradi.»