Рухсора Амирова
Amirova Ruxsora Azim qizi 18.05.2008-yilda Jizzax viloyatida tug‘ilgan. U hozirda Toshkent shahri Olmazor tumanida yashaydi. Ta’lim darajasi — tugallanmagan oliy. U Paxtakor tumanidagi 8-IDUMda hamda Jizzax davlat pedagogika universiteti akademik litseyida tahsil olgan. Jurnalistika sohasida tahsil olayotgan Ruxsora media, mobilografiya, videomontaj va SMMga qiziqadi.
U O‘zak yoshlari jamoasidagi faoliyatini boshlaganiga 2 hafta bo‘lgan. Hozirda jamoaning montajchisi hamda mobilografi sifatida faoliyat yuritadi. Shoxrux Kamolov bot orqali jamoa uchun e’lon berganidan so‘ng u ro‘yxatdan o‘tgan va Shoxrux Kamolov bilan shaxsiy suhbat asosida jamoaga qabul qilingan. U «O‘ZAK YOSHLARI» loyihasi hamda «DEBYUT» loyihasida faoliyat olib bormoqda.
Ruxsora ingliz tilidan B2 darajadagi sertifikatga ega. Shuningdek, u o‘zbek tili va adabiyotidan B darajali hamda tarixdan B darajali sertifikatlarga ega. U asosan video olish va montaj qilish bilan shug‘ullanadi, universitetdan so‘ng loyihalariga boradi. Bo‘sh vaqtlarida she’rlar yozadi, voleybol va dzyudo bilan shug‘ullanadi.
Uning jurnalistika va media sohasiga qiziqishi telefon orqali oddiy bir voqeani tasvirga olib, montaj qilganida, odamlarning ushbu materialga qiziqish bilan munosabat bildirganini ko‘rganidan so‘ng kuchaygan. Bu voqea unga axborot va voqealarni nafaqat kuzatish, balki ularni boshqalarga to‘g‘ri va ta’sirli yetkazish katta mas’uliyat ekanini anglatgan. Keyinchalik u mobilografiya va SMM bilan shug‘ullana boshlagan.
U kelajakda haq va adolat yo‘lida xolis xizmat qiladigan professional jurnalist, media loyiha muallifi hamda zamonaviy media sohasida o‘z uslubiga ega mutaxassis bo‘lishni maqsad qilgan. Uning eng katta orzusi qilayotgan ishi orqali shunchaki tanilish emas, balki odamlar ishonadigan, foydali va ta’sirli axborot yarata oladigan inson bo‘lishdir. Shuningdek, u o‘ziga xos media loyihalar yaratish va jurnalistika orqali jamiyatga foyda keltirishni maqsad qilgan.
Uning hayotiy prinsipi: «Hayotda har qanday to‘siqni ortga chekinish uchun sabab emas, balki o‘z ustingda yanada ko‘proq ishlash, imkoniyatlaringni namoyon etish va kechagidan kuchliroq inson bo‘lib shakllanish uchun berilgan sinov, deb qabul qil». U uchun liderlik hokimiyat emas, ishonch va mas’uliyatdir.
O‘z imkoniyatlaringizni boshqalarning fikri bilan cheklamang va maqsadingiz sari kichik qadam bo‘lsa ham, har kuni harakat qiling. Chunki katta natijalar bir kunda emas, izlanish, intizom va sabr orqali shakllanadi. Xato qilishdan qo‘rqmang, undan xulosa chiqarib, yana davom eting. Eng muhimi, bugungi kuningizni kechagi kuningizdan yaxshiroq qilishga intiling.