ABDUVALIYEVA MAFTUNAXON ABDUXALIL QIZI

Abduvaliyeva Maftunaxon — imkoniyat izlamagan, uni yaratgan yosh lider

Tug‘ilgan sana: 14-sentabr 2002-yil

Tug‘ilgan joyi: Farg‘ona viloyati, Buvayda tumani

Yashash joyi: Toshkent viloyati, Yuqorichirchiq tumani

Ta’lim: Qo‘qon davlat pedagogika instituti (2020–2024), Ingliz tili va adabiyoti yo‘nalishi. Hozirda — UDEA hamda Buyuk Britaniyaning top-15 talikka kirgan Coventry universiteti, Loyihalar boshqaruvi fakulteti talabasi.

Ilm va biznesni uyg‘unlashtirgan izlanishlar

Maftunaxonning faoliyati studentlik davridan boshlangan. Institutda o‘tkazilgan tanlov va bellashuvlarning deyarli barchasida faol qatnashib, insholar va maqolalar tanlovlarida g‘olib bo‘ldi. Biroq uning qiziqishlari faqat ilm bilan cheklanib qolmadi — u biznesga ham kirib keldi. Talabalik vaqtidayoq onlayn savdo, Instagram orqali mahsulotlar sotishni boshlab, bu borada ilk qadam tashlaganlardan biri bo‘ldi. Qisqa vaqt ichida o‘z faoliyatini kengaytirib, barqaror daromad manbaiga erishdi.

Bugun u nafaqat ilmiy izlanishlarda, balki yangi loyihalar, innovatsion g‘oyalar yaratishda ham faol. Shu sababli ham u Coventry universitetida loyihalar boshqaruvi yo‘nalishini tanladi. Zero, uning hayot falsafasida “Imkoniyat izlama, uni yarat!” degan tamoyil bosh mezon hisoblanadi.

E’tirof va mukofotlar

Maftunaxonning fidokorona mehnati qadrsiz qolmadi. U “Yuksak xizmatlari uchun” ko‘krak nishoni sohibasi bo‘ldi, shuningdek, ko‘plab xalqaro sertifikatlar bilan taqdirlandi. U yoshlar o‘rtasida bilim almashish va tajriba ulashishda ham faol: ilmiy maqola yozish, CV va motivatsion xat tayyorlash, PhD tadqiqotlar bo‘yicha maslahatlar berib kelmoqda.

Ayniqsa, u yoshlarni xalqaro grantlar, stipendiyalar, sammit va konferensiyalarga tayyorlashda bevosita yordam ko‘rsatmoqda. Shaxsiy loyihalarni yaratish, ularni biznesga aylantirish, global networking tashkil etish, raqamli iqtisodiyot va sun’iy intellektdan to‘g‘ri foydalanish bo‘yicha o‘z tajribasini o‘rtoqlashmoqda.

Ilhom va shaxsiy falsafa

Maftunaxonning hayotiy prinsipi qat’iy:

“Imkoniyat izlama — yarat. Ilming bilan dunyoni boshqar, aks holda u seni boshqaradi.”

Uning nazarida, haqiqiy lider — bilimli, tajribali va o‘z jamoasiga ishonch baxsh eta oladigan shaxsdir. Eng muhimi, lider o‘z xatosini tan olib, uni tuzatishga intilishi lozim.

Orzular va maqsadlar

Maftunaxon ta’lim va biznesning ikkala yo‘nalishida ham yetakchi bo‘lishni maqsad qilgan. U xorijiy tajribani kengaytirib, yoshlar uchun o‘quv va kasbiy rivojlanishga xizmat qiluvchi jamoa va loyihalar tashkil etishni niyat qilmoqda. Shu bilan birga, u yoshlarga shuni uqtiradi: “Ertaga degan narsa yo‘q. Har qanday muvaffaqiyat bugundan boshlanadi.”

Hayotiy saboq

Bugun u yoshlarni kuchli bo‘lishga undaydi:

“Yiqilsangiz ham qayta turing. Boshlagan ishni yarim yo‘lda qoldirmang. Oxirigacha intiling. Natija hech qachon sizni chetlab o‘tmaydi.”