SHAMSHIDDINOVA SEVINCH AZAMAT QIZI

Shamshiddinova Sevinch — distiplina va sabr orqali maqsad sari intilayotgan yurist talaba

Tug‘ilgan sana: 20-dekabr 2006-yil

Tug‘ilgan joy: Qashqadaryo viloyati, Kitob tumani

Yashash joyi: Toshkent shahri

Ta’lim: Toshkent davlat yuridik universiteti, Ommaviy huquq fakulteti, 2-kurs talabasi

Yo‘nalish: Yuristpendiya

O‘qishga kirgan yili: 2024-yil

Ilm sari intilish

Sevinch Shamshiddinova yoshligidan huquq sohasiga qiziqib keladi. 2024-yilda Toshkent davlat yuridik universitetining Ommaviy huquq fakultetiga qabul qilingan u, hozirda 2-kurs talabasi sifatida nafaqat nazariy bilimlarni egallamoqda, balki jamiyatdagi dolzarb masalalar haqida ham faol fikr bildiradi. U “Toshkent ovozi”da jamiyat hayotida muhim o‘rin tutuvchi muammolar haqida maqolalar yozib, ijtimoiy faolligini namoyon qilgan.

Ilhom manbalari va hayotiy prinsip

Sevinchning hayotida eng katta ta’sir va motivatsiyani ota-onasi bergan. Ayniqsa, otasining erta vafoti unga sabr va mas’uliyatni o‘rgatdi. Onasining duosi va otasiga bergan va’dasi uni eng og‘ir sinovlardan ham olib o‘tdi.

Uning hayotiy qarashlari bitta so‘zda jamlanadi: distiplina. U shunday deydi:

“Hayotda distiplinaga tayangan holda yashash kerak. Distiplina bor joyda albatta yuksalish va muvaffaqiyat bo‘ladi.”

Liderlik haqidagi qarashlari

Sevinchning nazarida, liderlik oddiy bir maqom emas, balki mehnat va mashaqqat evaziga erishiladigan yutuqdir:

“Lider — bu bir guruhni bir pozitsiyada ushlab turuvchi, har bir insonning xarakteriga qarab muomala qila oluvchi, qiyinchiliklarda yo‘l ko‘rsata oluvchi shaxsdir. Lider har doim prinsip, imij va xarakterga ega bo‘lishi shart.”

Uning fikricha, haqiqiy lider guruhga foyda keltiradigan, gapini o‘tkazadigan va eng muhimi, o‘rnak bo‘ladigan insondir.

Qiziqishlari va izlanishlari

Bo‘sh vaqtida Sevinch jinoyat ishlari bilan tanishib chiqadi. Har bir ishni o‘qishdan avval o‘z taxminlarini yozib, keyinchalik natija bilan solishtiradi. Bu odat unga huquqiy fikrlashni, tahlil qilishni va xulosalar chiqarishni o‘rgatmoqda. Bundan tashqari, yoshligidan she’r va maqola yozishga qiziqishi uni ijodiy jihatdan ham rivojlantirib kelmoqda.

Sabr va sinovlar orqali mustahkamlik

Sevinch hayotida og‘ir davrlarni boshidan o‘tkazgan. 12 yoshga yetmasidan otasidan ayrilishi, 2018-yilda chuqur depressiyaga tushishi, bulinglarga uchrashi unga oson kechmagan. Ammo ikki yil davomida sabr va iroda bilan o‘zini bu holatdan olib chiqa oldi. U shunday deydi:

“Mendan insonlar sabrni o‘rganishlari mumkin. 18 yoshimga qaramay ko‘p narsalar boshimdan o‘tdi va men ularning barchasiga sabr bilan dosh berdim.”

Maqsadlar va orzular sari

Sevinchning asosiy maqsadi — jamiyat uchun foydali prokuror bo‘lish. U jinoyat sodir etgan har bir shaxs adolatli jazo olishini ta’minlashni o‘z oldiga qo‘ygan. Bu uning orzusi emas, aniq maqsadi:

“Orzu orzuligicha qoladi, ammo maqsad — amalga oshadi.”

Shuningdek, u kelajakda o‘z kitobini chop etishni ham rejalashtirgan.

Yoshlarga murojaati

Sevinchning yoshlarga qilgan chaqirig‘i aniq va qat’iy:

“Sizga berilgan motivatsiya hech qachon maqsadingiz sari yetaklamaydi. Fokusingizni o‘zingizga qarating. Distiplinani saqlang. Sport bilan shug‘ullaning, til o‘rganing, keraksiz uchrashuv va yig‘ilishlarga vaqt sarflamang. Tavakkaldan qo‘rqmang, yangiliklardan cho‘chimang. Sizni buyuk kelajak kutmoqda.”