SHERZODOVA XULKAR SHERZOD QIZI

Sherzodova Xulkar — ijod, bilim va fidoyilik yo‘lidagi lider

Tug‘ilgan sana: 6-aprel 2001-yil

Tug‘ilgan joy: Toshkent viloyati, Oqqo‘rg‘on tumani, Sultonobod MFY

Ta’lim: Toshkent Davlat transport universiteti, Tashishlarni tashkil etish va transport logistikasi fakulteti bitiruvchisi; hozirda Harakat xavfsizligini tashkil etish va boshqarish yo‘nalishi magistranti

Faoliyat: O‘zbekiston Yozuvchilar uyushmasi Yosh ijodkorlar bilan ishlash bo‘limi mutaxassisi

Temir yo‘ldan adabiyotga — ikki olamning uyg‘unligi

Xulkar Sherzodova hayotida ikki soha — texnika va ijod doimo yonma-yon bo‘lib kelgan. U dastlab “O‘zbekiston” Lokomotiv deposida texnik texnolog, keyinchalik yoshlar ittifoqi koordinatori va pasportist lavozimlarida faoliyat yuritdi. So‘ngra Toshkent temir yo‘l texnikumida va maxsus fan o‘qituvchisi sifatida yosh avlodga bilim berdi. Bu yillar unga tartib-intizom, mas’uliyat va jamoa bilan ishlashning sir-asrorlarini o‘rgatdi.

Biroq uning hayotida ijod hamisha yetakchi o‘rin tutdi. Sho‘x kapalak, Buvimning ertaklari, Munavvar Tong, Vatan madhi kabi she’riy to‘plamlari chop etilgan. 2019-yilda Zulfiya nomidagi davlat mukofotiga sazovor bo‘lishi, keyinchalik 2025-yilda Turksoy tashkiloti tomonidan Jolon Mamytov nomidagi xalqaro mukofot bilan taqdirlanishi — uning ijodiy mehnatiga berilgan yuksak bahodir.

Ilhom manbalari va hayotiy yo‘nalish

Xulkar hayotida eng katta tayanch — bu buvisi, bobosi va onasi. Ular berkitgan mehr, sabr va tarbiya uning xarakterida qat’iyat va sadoqatni mustahkamladi. U o‘z prinsipini shunday ifodalaydi:

"Har qanday vaziyatda ham Allohga tavakkul qilib, doim olg‘a borish."

Uning fikricha, liderlik — tavakkaldan qo‘rqmaslikdir. Har bir tashabbus natija bersa — yutuq, bermasa — tajriba bo‘ladi.

Qiziqishlar va ichki dunyo

Bo‘sh vaqtida u qo‘lyozmalar bilan ishlaydi, badiiy kitob mutolaasi va teatr tomoshalari uning ruhiy oziqasidir. To‘qish, siyosiy suhbatlar, yaqinlari bilan bahs-munozaralar — hayotiga rang va fikr boyligi olib kiradi. Shu bilan birga, ilmiy izlanishlar ham uning doimiy faoliyatida muhim o‘rin tutadi.

Kelajak rejalari va jamiyatga xizmati

Xulkar o‘z oldiga yuksak maqsadlar qo‘ygan: aqlan ham, jismonan ham yetuk shaxs bo‘lish, jamiyatga foydali, yoshlarga namuna bo‘ladigan inson darajasiga yetish. U odamlar undan sodiqlik, tirishqoqlik va qat’iyatni o‘rganishlarini istaydi.

Yoshlar uchun xabari

Uning yoshlarga murojaati falsafiy va chuqur ma’noli:

“Motivatsiya har bir insonning ichida yashirin. Boshqalarning so‘ziga tayanib hayot qurish — zaif poydevorga bino qurishdir. Avval o‘zingizni anglang, missiyangizni tushuning va nima uchun yashayotganingizni bilib harakat qiling. Chunki inson shunchaki emas, balki maqsad bilan yashashi kerak.”