Dolmurotova Dilshoda Obid qizi

Dolmurotova Dilshoda Obid qizi 2007-yil 28-noyabrda Samarqand viloyati Past Darg‘om tumanida tug‘ilgan. U hozirda Samarqand shahrida yashaydi. U Sharof Rashidov nomidagi Samarqand davlat universiteti Markaziy Osiyo xalqlari tillari va madaniyati institutida bakalavr bosqichida tahsil oladi. Filologiya va tillarni o‘qitish: o‘zbek tili yo‘nalishining 2-bosqich talabasi bo‘lgan Dilshoda yosh ijodkor va kitobxondir.

U ijodini universitet talabasi bo‘lgan vaqtidan, ya’ni 2025-yildan boshlagan. Uning she’rlari va ijod namunalari Amerikaning "LULU" nashriyoti tomonidan chop etilgan "Ilm va ilhom chorrahasida" nomli to‘plamda o‘zbek tilida hamda Turkiyaning "KARDEŞ SESLER" nomli xalqaro antologiyasida turk tilida nashr qilingan. Shuningdek, she’rlari va ijod namunalari mahalliy jurnal hamda gazetalarda ham chop etilgan.

Unga Filologiya fanlari bo‘yicha falsafa doktori (PhD), repetitor hamda "Samarqand til maktabi" NTM asoschisi Samgin Qurbonov ta’sir ko‘rsatgan. Dilshoda abituriyentlik vaqtida undan tahsil olgan. Ustozi unga bilim bilan birga hayot yo‘lida asqotadigan tavsiya va tajribalar bergan; Dilshoda hozirgi qarorlarini qabul qilishda ham ustozining so‘zlarini yodga oladi.

Bo‘sh vaqtida u tikuvchilik bilan shug‘ullanadi, kitob o‘qiydi, rasm chizadi va raqsga tushadi. Uning fikricha, lider bo‘lish uchun eng muhim fazilatlar qat’iyatlilik va mas’uliyatdir. Kelajakda u o‘z sohasining yetuk mutaxassisi bo‘lish, o‘qituvchilik kasbini egallash, iste’dodli shoira bo‘lish hamda ko‘pgina davlatlarga sayohat qilishni rejalashtiradi. U hayotdan nolimasdan uni boricha qabul qilish, atrofdagi insonlarni sevish va hurmat qilish muhim, deb hisoblaydi.

Uning hayotiy prinsipi: "Olmos ishlov berilmay sof bo‘lmagani kabi, inson ham dard-iztirob chekmay komil bo‘lolmaydi."

"Hayotda muvaffaqiyatga erishish uchun uch narsa kerak: diqqat, intizom va harakat."