Rahimjanova Mashhura Rustamjon qizi

Rahimjanova Mashhura Rustamjon qizi 2004-yil 26-iyunda Namangan viloyati Chortoq tumanida tug‘ilgan va hozirda shu tumanda yashaydi. U Namangan davlat pedagogika institutida bakalavr bosqichini tamomlagan, hozirda magistratura bosqichi talabasi. Maktabgacha ta’lim yo‘nalishida tarbiyachi-pedagog va talaba sifatida faoliyat yuritadi. Faoliyatini 2022-yildan MTTga oid maqolalar yozishdan boshlagan.

U “Yil talabasi” tanlovi g‘olibasi, “Mahmudxo‘ja Behbudiy saboqlari” respublika insholar tanlovining faol ishtirokchisi hamda “O‘yin-ruhiy vitamin” kitobi muallifi. Uning maqolalari xalqaro “Page 3 New Times” gazetalarida nashr etilgan. Shuningdek, u “The World of Creators” mavzusidagi konferensiyada ishtirok etgan.

Mashhuraning hayotiga maktab direktori katta ta’sir ko‘rsatgan: u unga hayotda faqat olg‘a qadam bosishni va qoqilgan paytda qayta o‘rnidan turishni o‘rgatgan. U hech kim bilan emas, kechagi o‘zi bilan raqobat qiladi, qoqilish mumkin, ammo taslim bo‘lish mumkin emas deb hisoblaydi. Uning fikricha, lider bo‘lish uchun eng muhim fazilat — kamtarlik, qat’iyatlilik esa barcha insonlarning lider bo‘lishi uchun zarur.

Bo‘sh vaqtida badiiy asarlar mutolaa qiladi, kompyuter sohasiga qiziqadi va til o‘rganadi. Kelajakda maktabgacha ta’lim sohasida yetuk kadr bo‘lib, professor va katta o‘qituvchi ilmiy unvonini olishni rejalashtiradi. U bularning barchasiga kichik farzandi bilan erishishini aytadi.

“Oson yo‘lni emas, sizni rivojlantiradigan yo‘lni tanlang. Chunki haqiqiy o‘sish qulaylik tugagan joydan boshlanadi.”